كتب/ الباهوت الخضر

أشنتكلم بالبلدي بالفصيح ولهجة الرعاوية من سب يفهمونا اصحاب البلاد واولاد عمي اللي مشفتهملهمش كلمه ولا جملة يكتبونها وأنا شكلمهم بالمعنى مكنتونا انت خائن بيااااع مجوسي رافضي وملياااااان خبر” ماحد يتكلم به ” يا صحاب البلاد انا وانتم اليوم رأس براس نتصافي ويا عندكم ولا عندي مافيش مشكله والغلط يتصلح اهم حاجة الانسان لا يصر على الغلط

اولاً : مكنتمونا هذم اصحاب مطلع روافض مجوس وشغيروا الدين قلنا لكم المجوس طائفة انقرضت كانت بايران قبل الاسلام تعبد النار واولاد عمنا اذم ومافيش واحد يعبد النار منهم وان كنتم تقصدوا انهم معاهم فاونيس العتب على اللي ضرب الكهرباء وقلتم روافض يسبوا الصحابة قلنا لكم ماقد سمعناهم يسبوا واحد منهم والسيد كل ماطلع ترضى على الاخيار منهم ومادام وانتم تقولوا انهم اخيار خلاص انتهاء الموضوع قده المرجعية حقهم هكذا يقول مو عاد تدوروا وأن قصدكم السربلة محد قد ضرب واحد وقله سربل صميل ..؟!!

وبعد هذا وذا الجنة والنار بيد الله صح…؟!! خلاص هو داري من على الحق ومن لا وهو اخبر اين يدخل كل واحد النار ولا الجنة ايش دخلكم تدخلوا اللي تشتوا الجنة واللي تشتوا النار والله يقول لمحمد (ص) ( انك لا تهدي من أحببت ولكن الله يهدي من يشاء) وهو الهادي والبشير والنذير من صدق مش الزنداني ولا الحجوري ولا السديس ركزوا خلاص مادام وهم منحرفين خلوهم يضربوا تنكه

ثانيـــــا : قلتم : ” هذم اصحاب مطلع زيود يكرهوا نحنا من زمان ” نقل لكم نحنا من يوم نعرف انفسنا ونحنا ساكنين بصنعاء وذمار وعمران ونشتغل بصعدة بحجة محد قلنا من انتم .؟؟ في عنصرية عندهم نقلكم أنتم دارين من كان يمارس العنصرية من كانوا يمارسونها هم بيت الاحمر والمتنفذين السابقين لها هم اللي الان تقاتلوا انتم وهم بخندق واحد علي محسن وحميد واليدومي اللي كان بالامن السياسي يعذب السياسين وباقيت الشله حق الرياض أمهم بالعربي

ثالثــــــــا قلتــــم: مو نزلتهم من صعدة الى تعز قلنا لكم اكثر من نص أصحاب البلاد ساكنين من صعدة الى أب ولا حد قلهم جددوا الإقامة ولا وين الكفالة البلاد بلادك وااا حمادي من صعدة للمهرة ولا هم جاءوا من المريـــخ هم يمنيين أولاد عمنا شغبتم بصوتكم كله ومسكتم على وسطكم وقلتم : يا بياااااااع نحنا رحنا بلادهم وسكنا هناك بس بدون سلااااح ياخائن ! طيب لو تبندقتم منو شقلكم لا قالتم : لا هم نزلوا يعملو نقاط وسط الخط طيب نزلوا يعملوا نقاط هم دوله نزلوا بالميري ومافيش واحدباي دولة بالعالم يقول للعسكري المسؤول على أمن البلد مو نزلك المحافظة حقنا وكيف حراااااااااااام على بني عمنا ينزلوا من مطلع وهي بلادهم وحلال ياجي الزنجي والسوداني والامارتي والامريكي والكولبمي من طرف الارض عادي البلاد بلادهم صح ؟؟ اصلا …. البلدي يعجبه …. الغريب!

اشتصروا على قلة الحياء و اشتقولوا ومن قلك انهم دولة وهم حوثيين زيود من أصحاب مطلع شقلكم : كم منهم الحوثيين وكم هي صعدة اذه اللي توزعت بين المحافظات اليمنية كلها ولنفترض انهم محسوبين على الحوثيين وجالسين يسمعوا للزوامل اللي انتم تهيصوا عليها الوية الفرقة اذيك داخل تعز ولو سالتم طفل الفرقة تبع من بيقلك حق الاصلاح وحق من الإمن شقولوا لك ناصرين اغلبهم ومع ذلك مافيش واحد سال العسكري اللي يتنفذ عليه ولا مرور بالشارع يوم يوقفه : ايش أنتمائك الحزبي ..؟؟!

ربعـــــا : قلتم لا هم يتبعوا صاحب مطلع عبد الملك الحوثي طيب قلولي الاصلاح من قائدهم اليدومي والانسي والزنداني وعلي محسن وكلهم من أبناء مطلع او معاهم مخلقة من تعز ماناش داري والناصريين ماسكين بالزيدي صاحب مطلع الحمدي متشعبطين به بحالة وجار الله عمر من ذمار لو انتم ناسيين يارفاق .!!!؟؟؟ انا داري شقفز واحد ملذوع للوسط

وشقول: ياخي مانشتيهمش اكه بالمفتوح تعز وبس يكفينحنا اصحاب تعز جالسين نبقبق لإصحاب نزل وطلع ومعانا منهم حاجة القضية قضية تعز وبس اها قولوا كذا تمام يعني عصبية تعز وتعز كيان مستقل ومظلومية تعز ووو…الخ طيب تعز همشت في الماضي ظلمت هظمت صــح أنا معاكم بس قلوا لي منه اللي همشها وظلمها من أيام الثورة الى الان مش الحكم القبلي والذي كان على رأسه عبدالله بن حسين الاحمر واسرة الاحمر .؟؟!!

عبد الملك الحوثي وخبرته عادهم مخلوقين من أمس كانوا مهلهمش قلولي أينهم بيت الاحمر الان كلهم معاكم كلهم الان ينتصروا للتعز كلهم يحرروا تعز اين حميد وعلي محسن واليدومي اللي كان نائب خميس بالامن السياسي .؟؟؟؟؟ انتم تقاتلوا الان تحت أمرتهم ومن ولاهم مش هي السعودية اللي انتم الان بحضنها وتنتصروا لمظلومية تعز تحت امرتها.؟؟!! أشتقولوا: عفاااااااش معاكم شقلكم : عفاااش طلع وهذم كلهم شق رأسه واللي طلعهم طلعته وهم اللي كانوا يديروا الدولة من تحته والان بس مرضاااش يروح معاهم يقبل اقدام الملك ولا فاته الملهم والمنتصر لقضية تعز والمخلص ووو.الخ.

أخيـــــرا : بسألكم سؤال هل فعلا انتصرتم لقضية تعز وللعصبية التي أنتم خونتمونحنا كلنا اللي مرضيناش نرح نستجدي الملك معكم هل أنتصرتم لها ؟؟؟؟؟؟ اقلكم أنا: لا لم تنتصروا لها ولا حتى مناطقياً قاتلتم بأسمها ودمرتموها في سبيل أحزابكم وايديلوجياتكم نعم فعلتم ذلك الناصريين والاشتراكيين مسكوا بالحمادي واقتسموا الحجرية والاصلاح وحمود ماسكين الباقي من الحجرية ونص مدينة تعز والسلف هم وأبو العباس اقتسموا نص المدينة قسمتهم دعيتمونا بأسم تعز والانتصار لقضيتها وأنتصرتم لإيديلوجيتكم واحزابكم وأحقادكم فقط هذا هو الواقع فلا تزايدوا علينا …

انتم تاجرتم بها ولم تحبوا يوما واحدا تعز ولكننا نحن من أحببناها نحن منا احبها من قبة الرأس الى قاع الدرم احبنها بكلها يوم ان كانت موحده من شماريخ حيفان الى سواحل المخاء احببنا تعز التي كانت حاضنة للمشروع الوطني كاكل , يوم ان اكان أبنائها يقاتلون في الشمال والجنوب ايمانا بقضيتهم التي رأوها قضية الوطن باكمله فقاتلوا من جبال رازح حتى سواحل عدن عن قضية اسموها الجمهورية اليمنية الموحدة

ترك الرد

من فضلك ادخل تعليقك
من فضلك ادخل اسمك هنا